Police station/check post mamawh belh inti

Kolasib district bawrhsap Robert C Lalhmangaiha kaihhruaiin August 26, Thawhlehni khan District Level Security an ṭhukhawm a; chak zawka ramri venhim a nih theih nan police station leh check post mamawh belh a nih thu tarlan a ni.

Robert C Lalhma-ngaiha chuan, Kolasib district chu Mizoram luhka leh ramri depa awm a nih avangin dan leh thupekah inven lâwk a ngaih thu a sawi a, "Assam sorkarin tun hnaiah an ram chhunga dan loa awmte dap chhuah beihpui a thlak avangin Mizoram lama rawn luh tum an awm thei a, hei vang hian Kolasib district-a inner line permit(ILP) check post-te uluk zawka kalpui mek a ni," a ti a, sorkar hotute'n check gate-te chu an tlawh ṭhin thu a sawi.

Kolasib Bawrhsap chuan, dan loa Mizorama rawn lut tur ven kawngah ramri depa awm khawtlang hruaitute bakah mipuite'n an thawh hlâwk thu sawiin Bawrhsap chuan, sorkar hmalakna thlawp zel turin a sawm nghal a ni.

Ṭhutkhawmah hian Kolasib district-a police duty post leh ILP check post hrang hrangte dinhmun tarlan a ni a; check post-te inbiakpawhna leh inkalpawhna ṭha neih dan tur te, thawm ṭhat ngaite leh police duty post ṭhenkhat chu remchan zawkna avanga a hmun sawn ngai a awm thute an sawi.

Thawktu indaih lohna phuhrûk dan tur te, ILP check post hrang hrang tihchangtlun dan tur te, NH kawngpui thlûr lia siam hun ILP check post leh police check post tur te, Kolasib district-a rel chawlhhmuna ILP endik dan tur te, railway-a police duty tur mamawh dan te, Kolasib district-a venhimna lama chak zawka hmalak a nih thei nan police station leh check post siam belh dan turte an sawiho bawk.