Mizoramah 2021-22 leh 2024-25 inkarah cheng vbc 16,720 hû project kalpui a ni

MSME Export Promotion Council (EPC) buatsaih 'Study on Investment, Development & Growth in Progressive Mizortam 2021-22 to 2024-25 and Emerging Unlimited Opportunities' Volume-2 tarlan danin, Mizoramah 2021-22 leh 2024-25 inkarah cheng vbc 16,720 man project kalpui a ni.

Zirchianna hi August 26, Thawhlehni khan a buatsaihtu MSME Export Promotion Council chairman DS Rawat-a'n Delhi-ah an tlangzarh. MSME EPC zirchiannain a tarlan danin, 2021-22 aṭanga 2024-25 inkara Mizorama project hrang hrang kalpuia sum zat chu vbc 16,720 a ni a; kum li chhung hian cheng vbc 1,918 hû project thawh zawh a ni.

Kum 2021-22 chhungin Mizoramah investment cheng vbc 2,587 hû a lut a, kum 2022-23 chhungin vbc 126 hû, kum 2023-24 ah vbc 41 hu leh 2024-25 chhungin vbc 1,397 hû a lut bawk. Investment hrang hrang lutte chuan mi 30,000-35,000 inkar tan hna (direct employment) leh mi 20,000 tan indirect job a siam theih beisei a nih thu zirchianna chuan a tarlang.

Kum li chhungin Mizoram economy chu 13-15% inkarin a ṭhang tih tarlan a ni a; Gross State Value Added (GSVA)-ah service sector-in thawh hlawk berin, 45-46% a thawh. GSVA-ah hian industry sector-in a thawh zat chu kum 2021-22 ah 25% a nih laiin, kum 2024-25 ah chuan 34%-ah a kai chho a; primary sector - agriculture & aligned sector-in GSVA-a a thawh zat erawh 25% aṭangin 20%-ah a tlahniam thung.

MSME EPC chuan, Mizoramah industry lamin hma a sawn tih tarlangin, sorkar aṭanga ṭanpuina te, hmasawnna rulrel ṭhang zel leh digital lama hmasawnnate avangin a ṭha zel beisei a nih thu a tarlang a, "MSME hi economy-a hmasawnna atana pawimawh tak a ni," a ti.

Mizoramin tourism lamah theihna sang tak a neih thu tarlangin MSME EPC chuan, "Tourism lama theihna sang tak a neih hi a taka tipuitling tur chuan festival, eco-adventure package, wildlife safari leh trekking circuit te a tihhmasawn leh khualzinte hriat tura tihlâr a ngai a, village tourism tihchak a ṭul," a ti a; hmunhma leh ruhrel tihchangtlun a ṭul thu a tarlang bawk.