Board vice chairman hna thawh duhna Policy aṭanga chhuak a ni - MNF Treasurer

MNF treasurer K Vanlalauva chuan, MNF sorkar hnuaiah board vice chairman ruat an nih chhan chu hna thawh duhna policy aṭanga chhuak niin a sawi.

Old Secretariat building-a Sports, Youth Affairs, Tourism & ICT Board vice chairman TC Pachhunga pisa kumin atana hawnnaah thu sawiin K Vanlalauva, "Elected OB-te'n kan tih aia tam hret kan Chief Minister-in board vice chairman a dah nã a, a hnuah chuan ṭha kan tihpuiin âwm kan ti a, kan lawm hle a ni," a ti.

MNF Treasurer chuan, board vice chairman ruat chu party dangte'n sawisel mah se, an chhàn lêt loh thu sawiin, "Board vice chairman inruat hi hna thawh duhna policy aṭanga lo chhuak a ni a, kan CM hian minister remchàn loh laia lo enkawltu tur dah a pawimawhzia a hria a ni," a ti a; board vice chairman inruat avangin hnathawh a kal mar phah niin a sawi.

K Vanlalauva chuan, nghah peih leh dawhtheihin lukhâwng a nei nasa nia sawiin, "Nghah peih loh hi thil pawi tak a ni ṭhin. Pu Duhoma pawh hi hêk mai maia Speaker tihtlak theih a ni lo, MLA leh MP-te hi danin a phuar vek a ni. MLA aṭanga bàn a ni kha inthîkna leh inhuat vang a ni lo, danin thiam loh a chantir a ni. A duh chuan Supreme Court-ah a kal thei a, mipui court tih vel hi a awm tak tak lo," a ti.