BJP President sum tichingpenah puh

BJP, Mizoram Pra­desh-a IT and Social Media convener hlui K Vanlalruati chuan, Mizoram BJP president Vanlalhmuaka chu a thuneihna hmang sualah leh sum tiching­-penah a puh.

K Vanlalruati hian nimin khan Aizawl Press Club-ah thuthar thehdarhtute a kâwm ; Vanlalhmuaka leh a thurualpui hmeichhe pakhatin central aṭanga an sum hmuhte duhthálin an ching khawlo nia sawiin, "An duhsak zawng, anmahni'n an thunun theihte duhsakin state OB-te hriatpui lohin an pe kual a, thuneihna an hman sual avang hian party-in a tuar nasa hle," a ti.

President a nih veleh Vanlalhmuaka'n a thurualpuinu chu state secretary atan a ruat nghal nia sawiin K Vanlalruati chuan, "Anni pahnih hian central aṭanga sum lo kal, office atana hman tur leh district dang tana hman tur pawh pe hlei thei loin anmahni mimal tana hmangin an tichingpen nasa hle a ni," a ti a; Vanlalhmuaka'n a thurualpui chu an party sum aṭangin thlabi hlawh a pek thu a sawi.

K Vanlalruati chuan, Aizawl, Lunglei leh Champhaia an party office building chu ama hminga awm avanga hralh mai a tum thu sawi ṭhinah Vanlalhmuaka chu a puh a, "Hei hian mi tin huapzo president a nih lohzia leh ama pumpui ṭánghma hâia he party (BJP)-a awm a ni tih a tilang chiang hle," a ti.