ZPM Ṭhalaiin thu zûk lo turin Congress party hruaitute an ngen

ZPM Ṭhalai chuan thuchhuah siamin, MLA aṭanga Lalduhoma bàn a nih chungchangah MPCC hruaitute'n a thlavâng an hauh avangin an lawm thu an tarlang a, MPCC hruaitute chu an thu zûk lo turin an ngen.

ZPM thalaite chuan, Lalduhoma bàn a nih chung­changah MPCC chu MNF thil tihdan au chhuahpuia páwl dang zawng aia ṭhahnemngaihpuitu an nih thu sawiin, "MPCC President phei chuan 24.4.2020 khan thuchhuah siamin, 'Thil kalphung lang chiang sa reng, mipui pawhin an pawm thlap thil ching pawr lui a, ram leh hnam hmasawnna leh ram tana thil ṭha zawk tur ngaihtuah vang pawh ni loa mahni thawhpuite paih thlak tuma hmalakna hi ka dem...' tiin Pu Lalduhoma'n tih sual a neih lohzia a au chhuahpui tawh a ni," an ti.

Mizoramah policy ṭhaa inel a, mipui náwlpui dinhmun hniam lutuk khai chhuah a nih theih nan inelpuiah party dangte sáwmin ZPM Ṭhalai chuan, "Inphiarrûkna ram hlui zia hi titàwp tawh turin kan political party-puite kan sáwm a ni," an ti a; mahni thu zûk ṭhin politician-te chu kum 2021 aṭang chuan ram hlui zia kalsan tawh turin an ngen a ni.