Aizawla damdawi dawr 64 endik

Sorkar hotute chuan nimin khan executive magistrate John Lalramhluna Hnamte, Food and Drug Administration (FDA) aiawhte leh police-te'n Aizawla damdawi dawrte an endik a; sorkar dan leh thupek an zawm dan an enfiah.

Joint Inspection-ah hian, naupang leh school uniform hate'n damdawi ruih nana hman chi an lei tur venna atana Aizawl District Magistrate-in damdawi dawrah damdawi leitute lang thei ngei tura CCTV vuah vek tura hriattirna a chhuah bawhzui a nih dan an endik a ni.

Civil Hospital, Aizawl chhehvela damdawi dawr 64 endik a ni a, Magistrate thupek an zâwm ṭha tlangpui. Damdawi dawr pasarihin CCTV an la vuah lo a, a ṭul anga hmalak chhunzawm a ni dawn.

Damdawi dawr endik zinga 31 chuan ruih nana hman theih damdawi leh antibiotic hralh fimkhur ngai bikte ziahna tur, Schedule H1 register an vawng ṭha lo tih hmuh a ni. Chu'ng damdawi dawr 17 zingah chuan pharmacist ṭhut chilh dawr 17 chiah a awm a, a dang zawng chuan pharmacist enpui lohin damdawi an pe chhuak ṭhin tih hmuh chhuah a ni.

Pharmacy Act, 1948 leh Drugs Rules, 1945 chuan damdawi dawrah pharmacist an awm tur a ni a, pharmacist enpuina hnuaiah damdawi pek chhuah tur a ni, tih a ni. Pharmacist-in damlo hnenah a ṭul angin damdawi ei dan tur dik leh damlo hriat tur pawimawhte a hrilhfiah ṭhin tur a ni, tih a ni bawk