Vaivakawnah pipe siamṭhat hna ṭan

Vaivakawn Zohnuaia lei tlahniam vanga Tlawng lui aṭanga tui lakna pipe lian chhia siamṭhat hna chu August 27, Nilaini zan khan ṭan a ni a, PHE minister Prof. Lalnilawma'n bul a ṭanpui a, bialtu MLA Lalnghinglova Hmar leh adviser to CM Lalmuanpuia Punte, MLA te pawhin an ṭawiawm.

Prof. Lalnilawma chuan, Setlak lui chhuah aṭanga Tlawng lui tui pump chu ṭangkai taka hman ṭan a nih hnuah Vaivakawn Zohnuaia lei tlahniam vangin pipe eng emaw zat kal dan thlak a ngaih thu a sawi a, "Mipuiin kan mamawh ang tui kan chan ṭheuh theih nan hmalakna hi rang taka kalpui tum a ni. Lei tlahniam laiah pipe phûm tawh loin, kawng chungah kaltir a ni tawh dawn a, over ground pipe hi metre 80 vel a thui a ni dawn a, ni 30 vel chhunga zawh hman beisei a ni," a ti.

Bialtu MLA, minister of state Lalnghinglova Hmar chuan, ṭum eng emaw zat khuarel chhiatna thleng vanga Vaivakawn khawtlang hruaitute leh chhanchhuah leh chhawmdawl hna thawktu sorkar department hrang hrangte inrâwn a nih hnuah harsatna sutkianna tura hmalak a ni ta chu lawmawm a tih thu a sawi.

PHE hotute sawi danin, Setlak lui chhuah aṭanga tui pump-na, Greater Aizawl Water Supply Scheme Phase-III aṭang hian Vaivakawn Zohnuaia lei tlahniam vangin June 2, 2025 aṭangin tui pump a ni tawh lo.

Lei tlak hniamna lai, metre 80 vela thuiah kawng chungah pipe kaltir a ni dawn a; pipe len zawng diametre (a lian lai bera hawlh tlang) milimetre 711 leh pipe chhah zawng mm 8.7 a ni a, Eco Protection Engineers Pvt. Ltd.-in an siam dawn a ni.

Pipe siamṭhat hna ṭannaah hian PHE secretary Teresy Vanlalhruaii, engineer-in-chief Ngentluanga leh hotu dangte an tel a, PWD engineer-te an tel bawk.