Hunpui laia kawlphetha hman tam ber ní-ah 126 MW hmang

Krismas leh kum thar vuakvêt chhung khan Mizoramin kawlphetha a hman tam lai berin ni khatah megawatt 126 a hmang a, a tlangpuiin ni khatah megawatt 120-122 vel hman a ni.

State Load Despatch Centre (SLDC) superintending engineer JH Laithangpuia sawi danin, hunpui ni loah chuan chawhrualin Mizoramah ni khatah kawlphetha megawatt 90-100 vel hman a ni ṭhin. Kum 2020 krismas leh 2021 kum thar vuakvetah erawh chuan hun dang aiin kawlphetha hman a tam a, hman tam ber ní - December 23-ah megawatt 126 hman a ni.

JH Laithangpuia chuan, an inruahman lâwk ang aiin kawlphetha hman a tlem thu sawiin, Mizoramin kawlphetha a mamawh zat a pun zel avang leh khaw vawh vanga electric heater leh thil dangte hman a tam ṭhin avangin hunpui laiin megawatt 130 vel hmang tura an inbeisei thu a sawi a, "Covid-19 avangin kum dang angin concert, khawlai chei leh puipunnate a tlem a, kan hlauhthawn aiin power kan hmang tlem a ni," a ti.