PE health worker-te dah nghehna order sût turin NHM-a thawkte'n sorkar phût

National Health Mission Employees Union, Mizoram (NEUM) chuan thuchhuah siamin, sorkarin tun hnaia health worker, provisional employee (PE) eng emaw zat sorkarah a dah nghet chu hriatthiam har an ti a, a rang thei ang bera appoinment order sût leh turin sorkar an phût.

NHM hnuaia thawkte dah ngheh chungchangah Constitution Article 14 & 16 bawhchhiatna a awm theih thu sawi a ni ṭhin tih sawiin NEUM chuan, "The Gov’t of Mizoram Regularisation of CSS Employees Scheme 2024 hmanga PE-te dah nghehna tura Article 14 & 16 bawhchhiain, NHM (CSS) hnuaia thawk mek senior zawkte kal kâna junior zawkte an dah nghet ta mai hi hriatthiam har kan ti hle a, he appoinment order hi kan sorkar hian a rang thei ang bera sût leh turin kan phût tlat a ni," an ti.

NEUM chuan, October 21, 2014-a HFW lehkhaa tarlan danin, sorkarin a dah ngheh health worker-te chu DPAR leh Finance phalnaa lâk an ni mah se, co-terminus basis-a lâk leh regular an claim theih loh thu chiang takin order-ah tarlan a nih thu te, chuti chung chuan department hotute'n an hamṭhatna tur leh an ngheh theihna tur kawng hrang hrang an dap a, co-terminus an nihna pawh delete-na tur proposal an kaltir thu an tarlang.

PE health worker-te chu an hlawh lakna head 'CSS' a nih avangin CSS employee an nihna a awm lo tih sawiin NEUM chuan, "Anmahni pawhin CSS employee-ah an inngai ngai lo. Heti chunga Govt. of Mizoram Regularisation of CSS Employees Scheme 2024 hmanga dah ngheh an ni hi hriatthiam har kan ti... CSS hnuaia thawk chiang ngeite'n kan hman ve hma leh kan hman theih lohna tur kawng min siamsak leh, CSS ni lo zawka ngaihte’n he scheme an hmang bik hi kan sorkar hian ngaihtuah ṭha leh ngei rawh se," an ti.

Ram roreltute'n NHM hnuaia thawkte chu India Danpui kalha lak an nih thu an sawi ṭhin leh Chief Minister-in kumin Independence Day lawmnaa CSS hnuaia thawkte chungchang a sawi chhuah dan chu hriatthiam har an tih thu sawiin, "NHM hnuaia thawktute mipuite hriata min hnuaichhiahna thu a sawi leh hmun dangah pawh a sawi chhunzawm zel hi a nâ kan ti hle," an ti bawk.