Assembly session a ṭiak; bill pali pawm

Ni hnih awh Mizoram State Legislative Assembly pakuana ṭhutkhawm vawi ngana chu nimin tlai khan a ṭiak a, ni hnih chhungin sorkar bill pali pawm a ni.

Assembly session-ah hian August 27, Nilaini khan Mizorama kutdawh khapna dan, 'The Mizoram Prohibiton of Beggary Bill' pawm a ni a; he Bill hi Social Welfare and Tribal Affairs minister Lalrinpuii put luh a ni.

Assembly speaker Lalbiakzama chuan, session chhunga tih turte ruahman anga tluang taka an kal theih thu sawiin, Pathian hnenah lawmthu a sawi a, "Session chhunga member-te'n ṭhahnemngai taka kan ram leh hnam tana thâ leh zung, rilru leh ngaihtuahnate hmanga thawhhona hian rah ṭha a chhuah ngei ka beisei," a ti a; session hlawh­tlinna tura thawktu department hrang hrangte chungah lawmthu a sawi.

Tun ṭum session chhung hian Rajya Sabha MP hlui Ronald Sapa Tlau leh Dampa bialtu MLA Lalrintluanga Sailo te sûn an ni.

House chhunga chhàn chi zawhna (starred question) 350 lut zinga 342 pawm niin, paruk chu a thehlutute'n an hnûk lêt a; House-a chhàn tur 40 dah niin, panga chhàn hman a ni. Ziaka chhàn chi zawhna (unstarred question) 105 a lut a, 97 pawm niin, pasarih hnawl a ni a, pakhat hnuh lêt a ni. House-ah report 19 pek luh niin, paper 13 phar a ni a, official resolution lut awm chhun pawm a ni bawk.

BILL PAWMTE

1. The Mizoram Prohibiton of Beggary Bill (Social Welfare minister Lalrinpuii put luh)
2. Dan dinglai siamṭhatna, The Mizoram (Land Revenue) (Amendment) Bill, 2025 (Land Revenue & Settlement minister B Lalchhanzova put luh)
3. The Mizoram Local Bodies Ombudsman Bill, 2025 (UDPA minister K Sapdanga put luh)
4. The Mizoram Private Placement Agencies (Regulation) (Amendment) Bill, 2025 (LESDE minister Lalnghinglova Hmar put luh)