KHAWTHLIR

Music Festival chhunzawm dawn

Tourism minister Lalnghinglova Hmar chuan nimin khan ZPM member Lalramliana Papuia zawhna chhangin, Leitlangpui Music Festival chhunzawm zel tum a nih thu House a hrilh a, "Kumin atan hian November 13-15 hi Festival neih hun tura ruahman a ni," a ti.

Book Nest Initiative

September 8, 2025 aṭangin Lunglei khawpuiah Lunglei district-a thingtlanga zirlaite tan lehkhabu khawn khawm rûnpui 'Book Nest Initiative' neih a ni dawn. He hmalakna hi Lunglei bawrhsap Navneet Mann hoa ruahman a ni a; YMA, MHIP leh self help group ten kar hnih chhung Lungleiah lehkhabu an khawn khawm ang a, thingtlang, a bikin Lungsen Aspirational Block chhunga mamawhtute hnenah sem a ni ang.

DC leh BSNL hotute

Saitual bawrhsap Dr Lalngura Tlau chuan nimin khan a pisaah BSNL North East Circle hotute a kâwm a, internet connection chungchanga Saituala BSNL hmalak tum dan a sawipui. BSNL hian Saitualah Sept. 15, 2025 ral hmain optical fibre cable hmangin internet connection tih hman an inbeisei a; Freedom Plan hmangin August 31, 2025 thleng SIM card pakhat Re 1-a lei theih tur leh thla khat chhung free & unlimited service pek an tum.

Red Ribbon Quiz

Serchhip District AIDS Prevention Committee leh School Education department chuan nimin khan Serchhipah district level Red Ribbon Quiz Competition an buatsaih a, Presbyterian English School (High School Section) pakhatna niin, Mizoram pum inelnaah Serchhip district ai an awh ang. Pahnihna chu Marian High School an ni a, Chawngbuangi Memorial School chu pathumna an ni.

Sangha ṭanpuina

Hnahthial District Fisheries Office chuan nimin khan 'Awareness Training Programme for ST/SC Beneficiaries' an buatsaih. He hunah hian PMMSY 2024-25 hnuaia sangha dil siam ṭanpuina dawng tur mi 25 hnenah Rs 84,000 ṭheuh, PMMSY 2023-24 leh 2024-25 hnuaia sangha chaw leh thil dang leina dawng tur mi 22 hnenah Rs 30,000 ṭheuh pek a ni.