Intihhlimna buatsaihtute leh social media aṭanga sum la lutte'n chhiah an pek a ngai

State Tax Aizawl South Zone Deputy Commissioner chuan hriattirna tichhuakin, ticket emaw, man neia intihlimna lam chi buatsaihtute leh social media aṭanga sum la lutte'n The Mizoram Goods and Services Act, 2017-in a sawi angin chhiah (GST) an pek tur chin a awm thu a tarlang.

State Tax Deputy Commissioner chuan, The Mizoram Goods and Services Act, 2017-in a sawi angin intihlimna lam chi hrang hrang - mela, concert, sport event, movie chhuah, trade fair leh a dangte, ticket emaw, man neia buatsaih chi reng rengah chhiah a awm vek thu a tarlang a, "Aizawl district-a event buatsaihtute'n Deputy Commissioner of State Tax Office, MINECO-ah anmahni zone huam chhungah zel chutiang an huaihawt hma chuan an hriattir hmasa tur a ni," a ti.

Danin a remtih ang ni loa event buatsaihtute chu dan hmanga hrem theih an nih thu tarlangin Deputy Commissioner chuan, "Social media - Youtube, Facebook, Instagram leh a dangte aṭanga sum la luttute pawhin chhiah (GST) hi sorkarah an chhûn luh a ngaih chin a awm," a ti a; sorkarah dik taka chhiah pe tur leh khua leh tui ṭha ni turin mi tin a chah bawk.