Leilung hausakna zawn sawiho

Directorate of Geology & Mining leh Mineral Exploration & Consultancy Ltd. (MECL) chuan nimin khan Aijal Club-ah 'Unlocking Mizoram’s Mineral Potential: Exploration & Auction Frameworks' tih thupui hmangin Mizorama leilung hausakna awmte zawn chhuaha hman tangkai dan tur zirhona an buatsaih.

Zirhona hi Commerce & Industries secretary Dr Lalzirmawia Chhangte-in a kaihruai a; Mizoram tana leilung hausakna hrang hrang - lungalthei, chinai (limestone), tuialhthei leh gas bakah, rare earth elements (REE) zawn leh laih chungchanga hmalak tawhna te, hmalak mekte leh hmalak zel dan turte sawiho a ni.

Workshop-ah hian sorkar laipuia Ministry of Mines hotu te, MECL leh National Mineral Exploration Trust Secretariat aiawh te, Indian Bureau of Mines, Geological Survey of India, ONGC, Oil India, State Bank of India Capital Markets leh notified exploration agency aiawhte an tel a; Mizoram University, Pachhunga University College leh Zirtiri Residential Science College-a mithiamte an tel bawk.