JJM zawh tawhah sum hmuh loh a tam, Central-in min pek loh vang - PHE Minister

Public Health Engineering minister Prof Lalnilawma chuan, Jal Jeevan Mission (JJM)-ah project 368 zawh a ni tawh a, mahse, sorkar laipui aṭangin sum hmuh a la nih loh avangin financially-in zawh a la nih loh thu nimin khan Assembly House a hrilh.

ZPM member Lt.Col. Clement Lalhmingthanga zawhna chhangin PHE Minister chuan, "JJM-ah hian Mizoramin project 852 a thawk a, heng zinga 842 chu a taka zawh a ni tawh. Mahse, fund hmuh kim a la nih loh avangin scheme zawh tawh 842 zinga 368 hi financially-a la zawh loh a ni. Mizoram hi perfomance ṭha zingah a tel," a ti.

Prof. Lalnilawma chuan, financial achievment a ṭhat loh chhan chu inmawhpuh theih tak a nih thu sawiin, "Central-in JJM hi March 2024-ah a titawp a, thla eng emaw zat hnuah a pawtsei leh. Pawisa kan dil reng a, an rawn la release thei lo. Department pawhin theihtawp a chhuah," a ti a, Mizoram chauh ni lo, ram pum buaina a nih thu a sawi.

Sorkar laipuii JJM bill a la pek chhuah loh chu cheng vbc. 110 vel a nih thu sawiin Lalnilawma chuan, "State lam aṭang chuan kan tih tur kan tifel tawh a, central-in an la release thei lo," a ti.

PHE Minister chuan, JJM kalpuina khua zingah tuia harsatna tâwk leh tawh khaw 45 an awm thu sawiin, "A chhan chu tuihna tlem tâk vang leh solar pumping dahnain ní a hmuh ṭhat tawk loh vangte a ni. JJM guideline thar a la chhuak lo a, a chhuah hun atan kan inbuatsaih," a ti a, JJM guideline thar chhuah hun atan an inruahman lâwk thu a sawi.