Ruhro zir chianna report tichhuak

Tuidam leh Kawrtethawveng inkára kawng laih thara mihring ruhro hmuh chhuahte zir chianna report chu nimin khan Forensic Science Laboratory-in an tichhuak a; ruhrote chu kum 100 vel (+/- kum 20) kal taa phûm nia chhût a ni.

Ruhrote chu mihring 18 ruhro a ni a, kum 18-32 inkara upa eng emaw zat an awm laiin, upat lam chhût theih lohte pawh a awm. A vaiin a ruala phûm nia hriat a ni a, an dam laia hmanraw hmanga hliamna hnuhmá hmuh a ni lo. Kum 100 (+/- kum 20) vel kal taa phûm nia chhût niin, Mongloid thlah vek an nia hriat a ni.

An san zawng chu, a hniam ber ft. 5 leh a sang ber ft. 6'2" vela chhût a ni a, sàn záwng hriat theih loh an awm bawk. Hriat theih chinah hmeichhia pasarih leh mipa pahnih an tel a, mi dang pakuate chu hriat hran theih tawh loh khawpa ruh keh sawm tawh an ni. Tute nge an nih chiah hre tur chuan DNA profiling hmanga finfiah a ngai a, chuvang chuan hriat mai theih an ni lo tih Forensic report chuan a tarlang.