Riverine Reserve Forest area sorkarin uluk takin a ngaihtuah

Land Revenue & Settlement (LRS) minister B Lalchhanzova chuan, Riverine Reserve Forest (RRF) chungchang sorkarin uluk taka a ngaihtuah thu nimina Assembly session-ah House a hrilh.

MNF member Prova Chakma zawhna chhangin B Lalchhanzova chuan, RRF area huam chhunga tun hma aṭanga huan/ram/inhmun pass nei tawhte ram chungchang ngaihtuahin sorkarin hma a lak mek thu a sawi a, "Sorkar tan ngaihtuah thiam a har. Special Investigation Team te dinin, fimkhur tak leh uluk takin ngaihtuah a ni," a ti.

LRS Minister chuan, RRF chu kum 1965-a Assam gazette-ah chhuah a nih thu sawiin, "February 21, 2021 khan RRF notification hi high court chuan a ṭhiat a, Supreme Court chuan April 24, 2024-ah notifcation hi a ṭhiat," a ti a, Supreme Court-ah RRF chungchang a inchiah mek thu a sawi.