Zirtirtute'n badge dum bel

Mizoram Govt. Adhoc Aided School Teachers Association (MIGASTU) bultumin adhoc aided school zirtirtute chuan nimin aṭang khan an hnathawhnaah badge dum an bel ṭan a, sikulah flag dum an zar bawk.

MIGASTU hi sorkar hmasa hun laia dinhmun sang zawka a dahna order sorkar tharin an hnuh kîr (revoke) avangin an lungawi lo a, dinhmun sang zawka dah an nih leh theih nan hma la turin sorkar an phût a ni.

An dinhmun harsatzia leh hrehawmzia hriatsak a, hma la thuai turin MIGASTU chuan sorkar an ngen a; nimin aṭanga lungawi lohna lantira an hmalakna chuan awmzia a neih loh chuan district tinah kawngzawh rûnpui huaihawt tura an inrua-hman thu an tarlang bawk.