Lirthei lut turte zawm tur tichhuak

Disaster Management & Rehabilitation department chuan nimin khan state páwn aṭanga Vairengte kaltlanga Mizorama lirthei lutte zawm tur thupek thar a tichhuak a; entry point dangah erawh chuan kal dan ngaia kal tur a ni ang.

Mizoram sorkar thuchhuah tarlan danin, state páwn lam lirthei, a bikin bungraw phur driver leh handyman-te Vairengte checkgate-a Rapid Antigen Test (RAT) paltlang loa awlsam zawka an rawn luh theihna turin screening chauh paltlangtir an ni ṭhin. Hei hi driver leh handyman tam takin hmang sualin, an bungrua an unload hnuah sorkar thupek anga lêt leh mai loin Mizoram hmun hrang hrangah kal kualin backload chângin rei tak tak an chám ṭhin tih hriat a ni a, chuvang chuan Vairengtea lirthei rawn lutte tan ruahmanna thar siam a ni.

#    Bungraw dah hnua backload châng duhte chu Vairengte checkgate-ah Covid-19 negative certificate (RT-PCR/TrueNat/CBNAAT darkar 96 aia upa lo) nen an inhriattir tur a ni. Certificate nei lote chu Vairengteah man chawiin test an ni ang a, an positive a nih chuan Mizoram chhunga CCC hnai berah dah an ni ang.

#    Thupek zâwm lote chu dan anga hrem an ni ang.

#    District Task Force-te'n an district chhunga bungraw phur lirthei lutte chu dan an zawm leh zawm loh an endik ṭhin tur a ni.

#    Vairengtea lirthei lutte chu an thil phurh an hlànthlak zawh veleh an kîr leh nghal dawn a nih chuan Covid-19 negative certificate emaw, Vairengtea RAT paltlang kher a ngai lo.