ICFAI University-in Freshers’ Social hmang

ICFAI University, Mizoram chuan nimin khan Vanapa Hall-ah zirlai tharte lawmna, Freshers’ Social an hmang a, minister of state Lalnghinglova Hmar-in a hmanpui. Minister chuan, zirlaite chu hna zawngtu chauh nih tum lo a, mi dangte hna siamsaktu thlenga nih tum turin a chah.

Lalnghinglova Hmar chuan, zirlaite chu taima tura fuihin, "In zirlaiah leh in thil tih apiangah chhawr tlak leh ram tana chhenfakawm nih tum rawh u. Sorkarin zirlai leh ṭhalai lehkhathiamte bakah, thiamna bik neite tan India ram pawn thlenga hna an hmuh theihna tur a ruahman a, hna zawngtu chauh nih tum loin mi dangte hna siamsaktu thlengin nih tum ang che u," a ti.

Zirlaite chu hmathlir nei ṭha tura fuihin Minister chuan, "Mizoramah rél a lo lut dawn a, khawvel hmasawnna avang hrim hrim pawhin tourism huangah hna a tam chho dawn," a ti a, social media hman danah fimkhur tur leh ruihhlo laka inthiarfihlim turin a chah bawk.

Freshers’ Social hi ICFAI University vice chancellor Prof. Ginlianlal Buhril-a'n a kaihruai a, ICFAI University-a thawkte aiawhin Dr Aries Zoengliana'n thu sawiin, zirlai lut tharte aiawhin V Lalruattluanga'n thu a sawi bawk a ni.

ICFAI University, Mizoram hi The ICFAI University Mizoram Act, 2006 hmanga din a ni a, department 15 a awm mek. ICFAI Group of Education, Hyderabad hnuaia awm a ni a, he group hnuaiah hian university 11 leh business school 10 a awm a ni.