National Sports Day hman a ni

Nimin kha National Sports Day a ni a, Mizoram hmun hrang hrangah hman a ni. Kumin Day thupui chu 'Sport to promote peaceful and inclusive societies' tih a ni.

Aizawlah chuan Sports Authority of India (SAI) State Training Centre-ah Sports Day hman a ni a, Lunglei West bialtu MLA T Lalhlimpuia'n a hmanpui. MLA chuan infiammite chu an thlen chin aṭanga hmasawn zel tur leh tumruhna leh teirei peihna nei turin a fuih a, "Infiamna hi mihring hriselna atana pawimawh, taksa vawng ṭhatu leh rilru hrisel min siamsaktu a ni a, mihring inpumkhatna siamtu a ni," a ti.

National Sports Day hmanna hi Sports & Youth Services director H Lalhmingthanga'n a kaihruai a; SYS secretary K Lalrinzuali’n inlawmna thu sawiin, SAI regional director Lianminthang kaihhruaiin Sports Day thutiam sawi rual a ni. SYS hnuaia office pasariha thawktute leh infiammite chu infiamna chi hrang hrang hmangin an inel bawk.