Minister-in a biala sorkar P/S zirlaite pheikhawk leina a tumsak dawn

Minister of state Lalnghinglova Hmar chuan nimin khan a pisaah a bial Aizawl West-II chhunga sikul pathum hnenah computer leh printer a pe. Minister chuan, academic session tharah Aizawl West-II biala sorkar primary school zirlaite uniform pheikhawk leina a tumsak vek dawn thu a puang.

Lalnghinglova Hmar chuan, zirna a ngaih pawimawh thu sawiin, "Kumin chhungin ka biala sorkar sikulte tlawh chhuah leh vek ka tum a, session tharah ka biala sorkar primary school zirlaite uniform pheikhawk ka tumsak dawn," a ti.

Sikul tihhmasawnna tura hmachhawpte sawiin Lalnghinglova chuan, Labour, Employment, Skill Development & Entrepreneurship department kaltlangin KM HSS-ah skill lab din a nih dawn thu leh Samagra Shiksha aṭangin karleh lamah greenboard sem a nih tur thu a sawi a; a biala sorkar sikulte'n study tour/excursion an neih apiangin zirtirtute'n pawisa an thawh khawm a nih chuan, an thawh khawm belhkhawm ang zat zel a tumsak dawn thu a sawi bawk.

Minister hian Dawrpui Vengthar Middle School leh Kanan Middle School hnenah computer leh printer a pe a, Vaivakawn Middle School hnenah computer a pe a ni.