Siahaah sawhthing man la pek kim loh pe

Sorkarin Siaha district-a sawhthing a leisak, pawisa a la pek kim loh Rs 73,56,246 chu August 28, Ningani khan kut hnathawktute bank account-ah thun a ni. Siaha district-ah hian secondary collection centre (SCC) kaltlangin sawhthing quintal 2,774.09 lei a ni a, Rs 1,38,70,450 sèn a ni.

Sorkar thuchhuah tarlan danin, Mizoram sorkar hmalakna hnuaiah Siaha District Agriculture Marketing Committee chuan Siaha SCC leh Tipa SCC-ah kumin February aṭanga June 28 thlengin sawhthing sawhthing qtl 2,774.09 an lei a; Siaha SCC-ah qtl 1,303.82 leh Tipa SCC-ah qtl 1,470.27 an lei.

Sawhthing lei nana sum hman zawng zawng chu Rs 1,38,70,450 a ni a, Siaha SCC-ah Rs 65,19,100 leh Tipa SCC-ah Rs 73,51,350 hman a ni. Labour charge leh SCC hlawh lak hran hnuah Mizoram Agriculture Marketing Board account-ah Siaha SCC aṭanga sawhthing lei sa hralhna aṭangin Rs 17,83,639 leh Tipa SCC aṭangin Rs 21,40,492 thun a ni. Siaha SCC-ah sawhthing lei sate hralh zawh vek tawh a ni a, Tipa SCC-ah hralh loh tlem a la awm.

Siaha district-a sawhthing leina man la pek loh Rs 73,56,246 chu sorkar aṭangin tih tur pawimawh tihfel a nih hnuah dawn a ni a, August 27, 2025 khan bank-ah release order thehluh niin, August 28 aṭangin loneitute bank account-ah a lut a ni.