MPESSA inkhawmpui CM-in hmanpui

Mizoram Planning, Economic & Statistical Service Association (MPESSA) chuan nimin khan Planning conference hall-a inkhawmpui an hmang a, chief minister Lalduhoma'n hmanpuiin, project hrang hrangte'n Mizoram tan a pek turte man phaka an awm a ngaih thu a hrilh.

Chief Minister chuan, MPESSA member-te chu sorkar official data buatsaihtu leh department hrang hrang aṭanga project lutte zir chianga thlifimtu an nih thu a sawi a, "Kan sorkar hnuah project proposal zawng zawng in hnenah a lut hmasa ta vek a, in thuneihna leh thiltihtheihna kan tipung a, in thutlukna hian kan ram future a chhun a ni. Engkim chipchiar taka lo zir a, ram tan hei hian eng nge min pek dawn tih man phaka in awm a ngai," a ti.

Central fund hrang hrang Mizoramin a hmu ṭha thawkhat tih sawiin Lalduhoma chuan, "A bik takin SASCI leh DoNER-ah phei chuan hma kan sawn. In thawhrim zar a ni tih kan hria a, in chungah kan lawm," aa ti a; an kal zelna turah duhsakna a hlan.

Inkhawm hi MPESSA president H Lalnunzuala'n a kaihruai a, adviser to CM (Finance) TBC Lalvenchhunga, MLA pawhin thu a sawi.MPESSA-ah hian member 44 an awm mek a ni.