December-ah MC-in Rs. 10,20,000 vel hloh

Covid-19 léng avangin Millennium Centre chuan nikum December thla chhung khan Rs. 10,20,000 vel a hloh.

Kum dangah chuan December thlaah Millennium Centre (MC) chung záwl, kawt záwl leh a chhunga lift leh lift inkar âwl (atrium)-te chu dâwr siam nan an hmang ṭhin a; chu'ngte aṭang chuan luah man sum eng emaw zat an la lut ṭhin a ni.

Millennium Centre manager R Lalnunpuia chuan, Covid-19 léng avangin mihring veivâk an tlèm thu a sawi a, "Sûlhnu apps scan-na leh register-te luhka tinah kan chhawp a, kum dang ngaihtuahin 40% velin lut chhuak an tlem," tiin, thil bo report pawh an dawn meuh loh thu a sawi.

R Lalnunpuia chuan, punkhawm a rem loh avangin kum danga Millennium Centre chung záwl, kawt záwl leh a chhunga lift leh lift inkar âwl (atrium)-a dawr siam tura allotment an pek ṭhin chu tih a rem tawh loh thu a sawi a, "Kum danga December thlaa MC chhung dawr awm sa tih loh, dawr hrang hrang siam chawp luah man kan dawn ṭhin Rs. 10,20,000 vel chu kan chán a ni." a ti.

Krismas vuakvêt chhung atan Millennium Centre kawt záwl leh a chung záwl chu ni khatah Rs. 3,000 leh a chhunga lift leh lift inkar âwl (atrium)-te chu ni khatah Rs. 4,500-a luah theih a ni a; food court siamte'n chawhrualin ni khatah Rs. 5,000 velin an luah ṭhin a ni.

Millennium Centre chhunga dawr nei hrang hrangte chuan mipui veivâk awm nual tho mahse inhralh a harsat thu leh, kum dang anga an inhralh zat aṭanga chhûtin 50% pawh an phâk loh thu dawr ṭhenkhat chuan an sawi.

Dawr luah man chungchangah, dawr ṭhenkhat chu a neitute'n a luah man ngaihdam cháng an neih ṭhin avangin inhralh harsa mah se, an dinhmun a chhiat lutuk loh thu leh an lawm thu an sawi bawk.