Intlan chhâwk enchhin hun pawtsei

Aizawla lirthei intlân chhâwk dan siam rem enchhin mek chu November 30, 2025 thleng kalpui chhunzawm tura pawhsei a ni a; hemi chhung hian traffic dinhmun chiang zawk leh innghahna tlak data nei tura hmalak a ni dawn.

Chief secretary Khilli Ram Meena kaihhruai Coordination Committee on Traffic Management chuan tun hnai khan August 2025 chhunga Aizawla lirthei intlân chhâwk dan thar enchhinin nghawng a neih dant an thlir lêt. Intlân chhâwk chu November 30, 2025 thleng pawhsei an rel a, chumi chhung chuan traffic dinhmun chiang zawk leh innghahna tlak data neih a nih theih nan professional agency-te'n zir chiang se, an ti.

Tarlan danin, Aizawlah hian four wheeler taxi 3,880 leh two wheeler taxi 3,276 a awm mek a; four wheeler taxi 940 leh two wheeler taxi 121, an vaiin taxi 1,061-ten sticker thar an la hmang lo. Lirthei intlân chhâwk dan siam remah hian taxi-te hi sticker A,B, C, D leh E-ah ṭhen a ni a, ni khat chauh tlan loh ní an nei tawh a ni.

Lirthei intlan chhâwk hian mimal, sorkar leh bungraw phur lirtheite a huam a, zing dar 9:30 aṭanga tlai dar 6 thleng a ni. Inrinni, Pathianni leh sorkar pisa chawlh ní-ahte chuan intlan chhâwk a ni dawn lo a, lirthei zawng zawng tlan theih a ni.

Intlân chhâwkna tur chu, Bawngkawn leh Kulikawn (Tlangnuam panna pêngṭhuam) inkar tlangdung kawngpui (main spine) a ni a, Chaltlang lam leh Ramhlun lam kawng a tel ve ve a, Zarkawt phei leh Lower Zarkawt a tel ve ve. Sikulpuikawn leh Khatla inkar te, Khatla kawn aṭanga AR 23 Sector gate inkar te, Khatla kawn - Zodin Square te, Temple Square - Vaivakawnte a tel bawk.

Lirthei intlan chhâwkna tura ruahman ni lo zawngah chuan lirthei zawng zawng tlan theih a ni a, hei hian khawpui chhunga luh hun bik nei lirtheite erawh a huam lo.