KHAWTHLIR

Delhi RC charge la

Mizoram sorkar chuan Commerce & Industries secretary Dr Lalzirmawia Chhangte chu a pension avangin a aiawh turin Delhi Mizoram House resident commissioner Garima Gupta a ruat. Delhi deputy resident commissioner Alexander V Chongthu chu resident commissioner mawhphurhna la rih tura tih a ni bawk.

Minister-in tlawh

Home minister K Sapdanga chuan August 30, Inrinni khan Vairengtea Taxation checkgate leh Transport department checkgate leh weighbrigde te a tlawh. Weighbridge a tlawhnaah Minister chuan, bungraw phur lirthei liante'n an phurh tur chin aia tam an phur (overload) a nih pawhin, pawisa chawitir mai lo a, an bungruate hlan thlaktir ṭhin turin thawktute a hrilh a; a hma aia khauh lehzual turin a chah bawk.

Sorkar hna nghetah mi 830 la thawh

Department of Personnel and Administrative Reforms minister K Sapdanga chuan BJP member Dr K Beichhua zawhna ziaka chhangin, ZPM kaihhruai sorkarah sorkar hnathawk nghet (regular post) group A, B, C leh D post 830 lak a ni tawh tih Assembly session neih zawh takah khan a tarlang.

Zangnadawmna cheng vbc 3.73 pe

Animal Husbandry & Veterinary department chuan African Swine Fever (ASF) vanga vawk thi neitute hnenah zangnadawmna cheng vbc. 3.73 an pe chhuak tawh.Vanglaini thu dawn danin, ASF vanga thi vawk pakhat zelah zangnadawmna Rs 4,000 pek theih a ni a; chhungkaw 4,867 hnena pek tur sum zangnadawmna pek chhuah tawh niin, cheng vbc. 3.73 a ni. ASF vanga vawk thite hnenah zangnadawmna pek kim a la ni lo a, la pek loh zat chu cheng vbc. 2.44 a ni a, pe chhuak leh turin AH&Vety department-in an bawhzui mek.