Iskut thar tlakhniam chhan zirchianna Agriculture Minister-in a tlangzarh

Mission Foundation Movement (MFM)-in Mizorama iskut thar tlahniam zel an zirchianna chu August 29, 2025 khan Agriculture & Farmers’ Welfare minister PC Vanlalruata’n a pisaah a tlangzarh. Iskut thar chhuah tlakhniam chhan zingah, sik leh sa inthlak nasa leh chemical fertilizer hman ṭhin tihtawp thut te a tel.

PC Vanlalruata chuan, zirbingna chu a bul ṭanna tur chauh a la nih thu sawiin, "Sorkar chuan iskut chíngtute nen inkawm a, hmalak chhoh zel dan tur ruahman a tum. Sorkarin loneitute tan theihtawp a chhuah zel a, tung chíngtute nen pawh hma kan lak mek bakah, thlai chin pawlh (intercroping) hmangin cocoa chìn dan kan ngaihtuah mek," a ti a; KVK, Selesih chu loneitute tana ṭangkai tak a la nih zel dawn thu a sawi.

MFM executive director Lalramchuanzela tarlan danin, iskut zirchianna hi Durtlang, Sihphir leh Lungdaiah Ministry of Tribal Affairs hnuaia Tribal Research Institutes scheme aṭanga hmuh cheng nuai 25 hmangin Social Welfare department kaltlanga thawh a ni a; kum khat chuang zirchianna kalpui a ni.

Project coordinator HL Lalrinawma chuan, Sihphir, Durtlang leh Lungdaiah hian iskut tam tham tak thar a nih tawh ṭhin thu leh state pawnahte pawh thawn chhuakin chhungkaw tam takin eizawn nan an hman ṭhin thu a sawi a; kum 10 kal ta vel aṭangin iskut thar a tlahniam a, tun hnaiah a zuih ral titih tawh thu a sawi bawk.

ZIRCHIANNAA HMUH TLANGPUI
☑ Ram leilung a thûr deuh vek a, al a tam a, leiin tui a pai theihna a tlahniam.
☑ Leia thil ṭawih (soil organic carbon) a tlem tial tial.
☑ Thlaiin an mahmawh nitrogen, phosphorus leh potassium duhkhawp an pai lo.
☑ Rannungin a tichhe nasa.
☑ Sik leh sa inthlakin a nghawng.
☑ A chìnna hmun a awih.
☑ Chemical fertilizer an lo hmang nasa tawh a, tihtawp thut a nih vang.
☑ A chíngtute'n technical training mumal an dawng tam tawk lo.
☑ Hun rei tak a hmun ngaiah chìn ṭhin a ni a, soil testing neih loh avangin farmer-te'n an lei dinhmun an hre chiang lo.
☑ Tui an tlachham