Durtlang North-ah plastic bawlhhlawh lei

Durtlang North Local Council hnuaia Local Health Sanitation Committee (LHSC) chuan kumin August 2, 2025 aṭang khan an veng chhung a fai a, a thianghlim zawk theih nan khawlaia plastic kaihhnawih bawlhhlawh paih tawhte an lei.

Durtlang North LHSC hian August 30, Inrinni pawh khan plastic bawlhhlawh paih tawh an lei khawm leh a, naupang eng emaw zatin an chhungkuaa plastic bawlhhlawh an neihte leh khawlaia paih tawh an chhar khawmte an hralh. He hun hi Aizawl mayor Lalrinenga Sailo, bialtu councillor-in a hmanpui a ni.

Lalrinenga Sailo chuan, Durtlang North LC-in plastic bawlhhlawh lei khawm nachang an hria chu ropui a tih thu a sawi a, "Hei hi a tawpna tur a ni lo a, ka biala LC zawng zawngahte kalpui vek a ni dawn," a ti a, LC hmalakna chu AMC-in theihtawpa a puih ṭhin thu leh a puih zel dawn thu a sawi.

August 30 bikah Durtlang North LHSC chuan plastic ûm, sarâng leh Frooty/Appy bûr ruak Rs 10,000 chuang man an lei khawm a; Mayor-in senso phuhrûk nan Rs 10,000 a pek bakah, phurh khawmna tur garbage truck a ruahman a ni.