Mizoram Polytechnic harsatna sukiang turin sorkarin theihtawp a chhuah - HTE Minister

Higher & Technical Education (HTE) minister Dr Vanlalthlana hoin tun hnai khan Taxation Auditorium-ah college hrang hrang hotute'n HTE department hnathawh an thlir let. Minister chuan, Mizoram Polytechnic, Lunglei chu changtlung taka a awm theih nan hma an lak zel dawn thu a sawi.

HTE Minister chuan, Mizoram sorkarin college zirna leh zirna sang zawkte a ngaih pawimawh thu a sawi a, "Tun kum hnih kal ta khan central leh state sum cheng vbc 100 vel chu college-a zirna tihchangtlun nan ruahman leh hman tawh a ni. Mizoram Polytechnic ram chungchanga harsatnate sukiang turin sorkarin theihtawp a chhuah a zel a, hmasawnnate pawh kan hmu chho mek. Changtlung taka a awm theih nan hma kan la zel dawn a ni," a ti.

Mizoram Engineering College, Pukpuiah academic session thar aṭangin zirna kalpui ṭan theih beisei a nih thu sawiin Dr Vanlalthlana chuan, "Hmalakna hrang hrang a kal mek. Mizoram State University pawh sorkarin a buaipui mek a, tuna college hrang hranga zirna peng awm sate bakah, post-graduate subject zirna kan neih sate hmang ṭangkaiin cluster approach angin kalpui phawt kan tum," a ti. Department hnathawh thlirletna chu an hnathawhte inhriatpuina tur leh harsatna an neihte sutkian dan tur sawihona a nih thu a sawi bawk.

Hnathawh thlirletnaah hian Mizorama zirna sang zawk tihchangtlun zel chungchang leh a kaihhnawih te, harsatnate sutkian dan tur leh hmasawn dan turte sawiho a ni.