Dampa electoral roll buaipui turin ti

Election Commission of India (ECI) chuan Dampa Assembly Constituency by-election neih tur atana electoral roll ennawn chungchangah hriattirna a tichhuak a; draft electoral roll hi naktuk September 2-a tlangzarh tur leh, September 30, 2025-ah final electoral roll tlangzarh turin a hriattir.

Sorkar thuchhuah tarlan danin, Dampa bial MLA by-election atana Special Summary Revision of Photo Electoral Roll neih dan tur hunruat chu ECI-in August 19, 2025 khan a tichhuak. ECI ruahman dan chuan, July 1, 2025-a kum 18 tling chin behchhanin September 2, 2025-ah draft electoral roll tihchhuah tur niin, September 17, 2025 thleng siamṭhat tur nei tan dilna hun hawn a ni a, September 30, 2025-ah final electoral roll tlangzarh tur a ni.

ECI-in polling station siamṭhat ngai a awm leh awm lohte enfiah nan August 28, 2025 thleng hun a bituk angin Mamit District Level Standing Committee chuan hma an la a, polling station neih sate a ṭha tawkah an ngai.

Mamit District Level Standing Committee pawmpuinain kum 2025-26 atana Mamit district-a polling station draft list tlangzarh a ni. Draft list-a a lan danin, Dampa constituency-ah hian polling station 41 a awm a, voter 20,405 an awm bawk.