Thenzawl Peace City din tur lawm a ni; 'Peace City hi Mizoram tan a ni' - CM

Thenzawla Village Council, NGO, leh khawtlang mipui ṭangrual chuan nimin khan Thenzawl Peace City din tur lawmna inkhawm Joint YMA Hall, Bazar Vengah an buatsaih a; khuallian Lalduhoma, chief minister leh bialtu MLA chuan, Peace City din an tum chu Mizoram tan a nih thu a sawi.

Sorkar thuchhuah tarlan danin, Thenzawla mi nuai 10 vel chen theihna tur khawpui, km. 108-a zau awh turin sorkar laipuiin master plan siam a phalsak a, Ministry of Housing & Urban Affairs-in master plan siamna tur cheng vbc 10 a rawn pe. July 22, 2025 khan master plan siamtu tur zawnna hmahruai Request for Proposal for Selection of Consultant tihchhuah a ni a, company 18-in an ngaihven a ni.

Chief Minister chuan, Mizoramin khawpui changkang leh tunlai, fel taka duan sa a mamawh tih sawiin, "Thenzawl hi chutiang din nan chuan a rem hle. CM ka nih hnuah Prime Minister nena kan inhmuh ṭum hnihnaah ka nun kawngte min zawt a. Pi Indira Gandhi nena kan thawh dun dan te, IPS hna ka bànsan chhan te, MP zinga Anti Defection Law hmanga paih hmasak ber ka nih chhante chu Mizoram buaina a reh a, muanna a lo awm theih nana ka thiam ang anga ka beih vena vang a nih thute ka hrilh ve a ni," a ti.

PM hnenah, 'Mizoramin remna kan nei ta a, India rama inremna hlawhtling ber zinga mi niin, state ralmuang ber kan lo ni ta. Planned city kan nei bawk si lo a, mi nuai 10 vel chen theihna tur peace city min pe rawh' tia a dil thu sawiin Lalduhoma chuan, "Hei hi Aizawl sawn tumna a ni lo a, chutiang zawngin kan sawi ngai lo. Mizoramin khawpui mawi leh changkang tak kan neih ve theih nan khawpui thar din kan tum zawk a ni," a ti a, Thenzawl tan bik ni loin, Mizoram tan a nih thu a sawi.

Chief Minister chuan, master plan siamna chauh an la dawn thu sawiin, "A taka hmalakna tur hi kan la ngaihtuah zel ang. 15th Finance Commission sum chuangbâng, Prime Minister kuta awm mek chu dil kan rilruk mek. Sairang rel station hi Prime Minister-in a rawn hawng dawn a, Peace City lungphûm pawh a rawn phûm theih kan beisei mek," a ti a; rêl kawngin Thenzawl Peace City thleng thuai se an duh avangin hma an lak mek thu a sawi bawk.

Thenzawl khawchhuak minister of state B Lalchhanzova pawhin thu sawiin, Thenzawl chu hmân aṭang tawhin khawpui a la nih tur thu mi tam takin an lo sawi tawh ṭhin tih a sawi a, "A takin a lo thleng dawn hnai ta. Mipuite kan hlimin kan lawm hle. Thenzawl hi Bengkhuaia lal ram chhunga awm niin khawper a lo siam ṭhinna a ni. Mary Winchester chungthua British sorkar aiawh TH Lewin nena saui an tanna pawh tuna Thenzawl thlanmualah hian a ni a, Peace City dinna hmun atan pawh a inhmeh hle a ni," a ti.

Inkhawm hi Thenzawl Joint VC chairman B Lalrinliana'n a kaihruai a, Thenzawl mipui aiawhin Vantawng Group YMA president C Lalnunthara'n thu a sawi.