KHAWTHLIR

EMRS Sports ṭan

4th Mizoram Eklavya Model Residential School (EMRS) State Level Sports Meet chu nimin khan Rajiv Gandhi Stadium-ah ṭan a ni a, EMRS 11-a zirlaite infiamna chi hrang hrangah an intihsiak. Ni thum awh tur Sports Meet-ah hian zirlai 330 leh zirtirtu 33 an tel a; football, taekwando, judo, boxing, wrestling, table tennis, badminton leh athletics-ah mipa leh hmeichhia an intihsiak dawn. National level EMRS Sports Meet-a tel tur zawnna a ni nghal bawk.

Kawng sawiho

Champhai District Disaster Management Authority chu nimin khan an ṭhu a, tun hnaia Aizawl-Champhai kawng hlui Chhungte bula leimin leh lei tawlhin NH-06 kawng a hnawh vanga harsatna chinfel dan tur an rel. Champhai-Aizawl kawng hlui siam ṭhat dan tur bakah, kawng siam chhunga a hêlna kawng siam dan tur sawiho a ni.

Loneituite ṭanpuina

Khawzawla KVK Training Hall-ah nimin khan Indian Institute of Horticultural Research (IIHR-NEH) scheme kaltlangin Khawzawl district khaw pasariha kut hnathawktute hnenah Rs 4,30,000 hû tomato chi kg 12 leh rannung laka tomato venna tur Arka Neem Soap quintal khat sem a ni. KVK mithiamte'n tomato natna hrang hrang leh rannung ven dan te, chìn dan ṭha zawkte an zirtir bawk.

Sangha khawi zirtir

Fisheries department chuan nimin khan Saitual district-a sangha khawitute tan NFDB (PMMSY) hnuaiah zirhona an buatsaih a; mithiamte'n induce breeding hmanga sangha thar chhuah dan te, dil sawngbawl dan leh sangha natna hrang hrang enkawl dante an zirtir.

Polling station siam rem sawiho

Nimin khan Lunglei District Level Standing Committee (DLSC) chu an chairman Navneet Mann, district election officer hoin Lunglei DC conference hall-ah an ṭhukhawm a, an district chhunga polling station ṭhenkhat siam rem, siam thar leh ṭhiah ngai chungchang an sawiho.