Thenzawlah 3rd Mithun Day hman a ni

Nimin khan Thenzawl Auditorium-ah AH&Vety department leh ICAR-CIRG buatsaih 3rd Mithun Day leh National Seminar on Integrated Mithun Farming hman a ni a; khuallian Chief minister Lalduhoma chuan, Handholding scheme pilot phase loan dil mi 3,647 leh CM Special Package-ah mi 13,019-in ṭanpuina an dil thu a sawi.

CM Lalduhoma chuan, Mizo zingah ran vulha eizawng duh an la tam thu sawiin, "Handholding scheme pilot phase-a loan component hnuaiah mi 3,647 leh CM Special Package-ah mi 13,019 ten ran vulh lama hmalak an rawn dil," a ti.

Chief Minister chuan, "Mizoram hi ran vulhna atana ram ṭha ni mah se, a vulh dan thiamna lamah ṭan lakna tur tam tak kan la nei," a ti a; training tam zawk neih leh hmanraw ṭha zawk chhawp tura ṭan lak a ṭul thu a sawi.

Sial vulh chu hmarchhak state mipui tam tak nunphung nen a inzawm tlat tih sawiin Lalduhoma chuan, "Mizo hnam nunah pawh dinhmun pawimawh tak luahtu, hausakna tehkhawng atana hman ṭhin a ni. Chhungkaw tam takin eizawnna pêngah sial vulh an la kalpui a, khaw 41 velah kan uar zual. Sial hlutna hi a tlahniam thei lo a, kan eizawnna kawngah dinhmun pawimawh tak a chang zui zel a ni," a ti.

Lalduhoma chuan, agriculture leh a kaihhnawih lama Mizoram thawh chhuah zawng zawng 23% vel chu AH&Vety department lam aṭanga hmuh a nih thu sawiin, "Kum khat chhungin cheng vbc 630 man vel sa kan ei a, chu'ng zinga vbc 40 man vel chu state pawn aṭanga kan lak luh a la ni," a ti a; sa thar leh ran vulhtute tihchak lamah ṭan lak a ṭul thu a sawi.

Chief Minister tarlan danin, North Eastern Council ṭanpuiin Lungkawlhah Mithun Multiplication Centre siam a ni a, Rashtriya Gokul Mission hmangin Thenzawlah Mithun Breed Development & Conservation Centre siam a ni. Sialah hian nuclues station leh scientific breeding centre mamawh a ni a, NCR Mithun aṭangin ṭanpuina hmuh theih beisei a ni.

Khualzahawm pahnih - AH&Vety minister C Lalsawivunga leh Arunachal Pradesh Agriculture & Allied minister Gabriel D Wangsu te pawhin thu an sawi a; chawhnuah National Seminar on Integrated Mithun, Goat, Poultry & Pig Farming neih zui a ni.