Hulhliap SCC chhuakte tan training ṭan

Hulhliap Short Stay Centre batch khatna leh hnihnaa awm tluante tan Dawrpui Vengtharah thiamthil zirna tur Hulhliap Training Centre buatsaih a ni a, Social Welfare minister Lalrinpuii'n nimin khan a hawng. Training turin mi 80 an inziak lut a, Discipleship Training Centre-a Pathian thu zir tur mi pali sponsor a ni dawn bawk.

Hulhliap SCC batch khatnaah mi 256 inziak lutin, a tawp thlengin mi 116 an awm a, batch hnihnaah mi 544 lutin, a tawp thlengin mi 248 an awm. Batch 3-naah mi 212 inziak lutin, a tawp thlengin 170 an awm a ni.

Training tur mi 80-te hi Hulhliap SCC batch khatna leh hnihnaa mite an ni a; assistant electrician zir tur mi 34, aluminium fabrication zir tur mi 28 leh food processing zir tur mi 18 an ni. Hulhliap chhuak vêk mi pali chu DTC-ah Pathian thu zirtir an ni ang.

Minister Lalrinpuii chuan, training turte chu tumruhna nei turin a fuih a; electrician leh fabricator-te chu mi tin mamawh an nih avangin thiam taka an zir chuan eizawnna tling a nih thu leh, Mizorama thil tharte sawngbawl lama thawk tur pawh mamawhna a awm reng thute a sawi.

Sorkarin ruihhlo leh ruihhlo ti ṭhin titlem turin nasa takin hma la mah se, do rêm a harsa hle tih sawiin, "Hulhliap chhuakte hi ṭhangthar ruihhlo la khawih ve lote hnena a ṭhat lohzia zirtirtu ni turin ka ngen che u a ni," a ti a; Handholding policy hnuaiah sorkarin Hulhliap chhuakte a duhsak dawn thu sawiin, an hun ṭha bawhpelh lo turin a chah.

Hulhliap Task Group on Aftercare, Skill, Training & Handholding chairman Malsawmzuala Ralte pawhin thu sawiin, training-a telte chu an chhuah hunah khawvel an la hmachhawn dawn chauh tih a hrilh a; an thiamthil zir chhuahte chu chhungkaw châwmna tlaka thiam tum tlat turin a fuih a ni.