Mobile forensic vehicle 10 vailiam

Forensic Science Laboratory (FSL)-in mobile forensic vehicle 10 an neih thar chu nimin khan Home minister K Sapdanga'n FSL kawtah a vailiam. Minister chuan, Home department-ah sorkar lirtheite a hmanna tur ni loa hman pên a remchan loh thu a sawi.

K Sapdanga chuan, sualna hrang hrang ûm pha tur leh sualnate chhui chhuak turin thiamna leh hmanraw ṭha zawk mamawh a nih thu a sawi a, "India ramah sual chhui chhuak turin Forensic hi thawk ṭha pawl an ni a, hnu chhuina atan lirthei mamawh a ni. Sorkar motor hi a ni loa hman pên a awm ṭhin a, Home department-ah chuan chutiang chu a remchang ve dawn lo. Heng lirtheite hi a hmanna tur dik takah hman a ni dawn," a ti.

Home secretary Vanlalmawia pawhin thu sawiin, "Central-in forensic tihchak a ngai pawimawh a, khawl pawimawh 15 leina tur cheng vbc 6.13 man leh motor (forensic van) 10 leina tur min pe," a ti a; criminal law thar hnuaiah kum 7 tan ngeina tur chi thil sual tihna hmunte forensic mithiamten an kal chilh ngei a ngaih avangin, mobile forensic van-te chu ṭangkai taka hman turin lei a nih thu a sawi.

Directorate of Forensic Science Laboratory-ah hian director T Lalropuia hoin expert mi 14 an awm mek. Directorate hnuaiah Aizawl, Lunglei leh Champhaiah District Mobile Forensic Unit hawn a ni a, district dangah pawh hawn belh tum niin, thawktu pawh lak thuai tum a ni.