END-a thawk tharte Minister-in a fuih

Excise & Narcotics department chuan sub-inspector pasarih leh constable 10 lak thar, Central Training Institute (CTI), Sesawnga training ṭan turte pualin Commissionerate-ah flag-off programme an buatsaih a, Excise & Narcotics minister Lalnghinglova Hmar-in hmanpuiin, fuihna thu a sawi.

Lalnghinglova Hmar chuan, thawktu tharte chu zu leh ruihhlo man tura lak an nih avangin an thil man tur zawk intihbuaitir lo turin a chah a, “Mi pangngai aiin Excise & Narcotics department-a a thawkte chuan zu leh ruihhlo in hmu tam zawk dawn a, mi pangngai aiin a leta insûm theih a ngai dawn. He department-a rei tak thawk tawh, zu leh ruihhlo a buai lo mi tam tak an awm a ni," a ti a, ṭhahnemngai taka thawk turin a chah.

Excise Minister chuan, sorkar hnathawk zingah transfer & posting-a buai an awm ṭhin thu sawiin, buai ve lo turin thawktu tharte a chah a; Excise & Narcotics department-in district hrang hrangah office a neih avangin sorkarin a dahna hmunah ṭha taka thawk tura a beisei thu a sawi bawk.

Inkhawm hi Excise commissioner Z Lalhmangaiha'n a kaihruai a, Excise & Narcotics secretary Vinod K Pavle pawhin thu a sawi a ni.

Excise & Narcotics sub-inspector leh constable lak tharte hian vawiin hian CTI, Sesawngah induction training an ṭan dawn a, thla ruk chhung hun an hmang dawn a ni.