Larsap Shreedharan Pillai-a'n Saitual a tlawh

Governor PS Shreedharan Pillai chuan nimin khan Saitual a tlawh a; Saitual auditorium-ah vantlang inkhawm a hmanpui bakah, Saitual damdawi-in (Community Health Centre), Saitual College, Salvation Army enkawl hnuchham rûn 'Hlimna In' leh Ṭamdil-te a tlawh.

Larsap chuan, Mizo mipui rilru ṭha a tih thu sawiin, "Chu chu Prime Minister hnena Mizote chungchang ka sawi dan a ni. Mizoram ralmuang tak, hmeichhia leh naupangte thlamuang taka páwna an chhuah ngamna hi ka chhuang em em a ni," a ti a, state dangte tan entawn tlak a nih thu a sawi.

Saitual khua chu tun hmain sakhuana vanga tihduhdahna tâwktute tlan khawmna leh inhumhimna hmun a ni tih a hriat tawh thu sawiin Governor chuan, "Saitual leh India hian inanna tak an nei a, chu chu sakhuana vanga harsatna tâwkte thlamuang taka awm awm khawmna a ni," a ti.

PS Shreedharan Pillai chuan, Saitual district-in hma lam hun êng tak a nei tih sawiin, "District awmna hi ram laili ni tho si, Manipur leh Myanmar ramri hrûl ni bawk si a ni," a ti a; remchanna tam tak, sumdawnna leh thil dangahte a awm rualin, páwn lam aṭanga thil ṭha lo hrang hrang lut thei lakah fimkhur a ngaih thu a sawi.

Governor chuan Saitual College a tlawhnaah zirlaite fuihin, "Degree neih ringawt leh ziak leh chhiar thiam ringawt hi eizawnna atan a tlak tawh lo a, mahni kutkea eizawnna insiam tum tur a ni a, hmathlir fing tak vanga hlawhtlinnaahte Mizoramin a hlâwkna tél se ka duh," a ti. Hlawhtlinna ringawt ngaihtuah a pawimawh ber lo tih sawiin, "Mi dangte nen kan inrem em, vantlang tan ka ṭangkai em tihte kan mamawh zual hle," a ti.

PS Shreedharan Pillai hian Saitual damdawi-ina damlote a tlawh kual a, damdawi-in hmuhmate leh bungraw neihte a en bakah, thawktute dinhmun a zawt a; medical officer Dr Lucy Lalsangpuii hnenah Saitual CHC poor fund atan pawisa a hlan bawk.

Saitual damdawi-inah hian khum 30 awmin, medical officer pali leh nurse 10-in an enkawl a; inzai tênau, nau neih, insiam, ha phawi leh laboratory test ṭul zualte tih theih a ni.