Contract hralh chíngte hi ram leh Hnam hmelma an ni - CM Hawla

New Secretariat Complex-a Power & Electricity E-in-C office thar, 'Kawlphetha' tih chu nimin khan chief minister Lal Thanhawla'n a hawng. Office sak nan hian cheng nuai 953.28 sên a ni. Chief Minister chuan, contract duh si, hralh chhàwn leh chíngte chu ram leh hnam hmelma an nih thu a sawi.

CM Lal Thanhawla chuan, Mizoramah contract hna a ṭhat telh telh thu sawiin, "Engineer-te'n an hnuaia hna thawkte an la hrual deuh erawh a ṭul. Workmanship
ṭha taka sorkarin sum tam tak sênga hma a laknate tihpuitlin zel a pawimawh. Contract duh si, hralh chhàwn leh chíngte hian sim se ka duh. Contract hralh chíngte hi ram leh hnam hmelma an ni," a ti.

Rel kawng siam mek leh state ramri hrûla Trade & Commerce gateway siam mekte chuan hna tam tak leh sumdawnna tam tak a siam tur thu sawiin CM Hawla chuan, "Power & Electricity mamawhna nasa taka a pung dawn a, power hnianghnâr a awm theih nan kawlpetha siam chhuah kawngahte bakah, ni zung chakna leh thli chakna hmanga power siam chhuah kawngah sorkarin nasa takin ṭan a la mek zel a ni," a ti a; Trade & Commerce gateway pawimawh state páwn mite'n an nghakhlel zawk chu Mizo mipuite inenfiahna tur ni se a duh thu a sawi.

Hawla chuan, Mizoram chheh-vela hnam dang nuai chuang aia tam mah Mizoramah hna thawka an awm chu pawi a tih thu sawiin, "Mizoram sum vaibelchhe tam tak Mizoram páwnah a kal liam loh nan ṭhalaite'n thawh hreh neih bànsan a, thawh theih vek duhna rilru an put a ṭul tawh tak zet a ni," a ti.

New Economic Development Policy chung--chang sawiin Chief Minister chuan, "NEDP hmalakna tharin NLUP hlawhtlin-puitute tihchak an ni dawn a, NLUP hmalaknaa chhawmdawl chhunzawm ṭulte pawh chhawm-dawl an ni dawn," a ti a; NEDP hnuaiah mi
ṭhahnemngai, ṭan lak nachang hria leh hlawhtlin ngei tuma beitute puih an nih tur thu a sawi.

Power & Electricity engineer-in-chief L Pachuau pawhin thu sawiin, Mizoramin kawl-phetha a mamawhna a pun zel thu a sawi a, "Gas vàn lai leh Krismas hun lai phei chuan kawl-phetha megawatt 112-te a hman a ni
ṭhin. Mipuite'n kawlphetha renchem thiam leh kawlphetha heh lo electric hmanruate hman intihhmuh a pawimawh," a ti.

L Pachuah sawi danin, Mizorama khua zawng zawng electric power pek a nih theih nan thingtlang khaw 29 chiah electric hruia thlun zawm tur a awm tawh a, 100% electrification turin bawhzui mek a ni.

Technical report-a tarlan danin, P&E E-in-C office building, 'Kawlphetha' sak hna hi April 3, 2013-ah ṭan a ni a, November 28, 2015-ah sak zawh a ni.

P&E department statistics-in a tarlan danin, Mizoramin 132 kV sub-station pariat, 33kV sub-station 52 leh transformer (DT) 1,882 a hmang mek a; 132Kv hruipui km. 728.96-a thui thlun niin, 33kV hrui km. 1041.06, 11kV hrui km. 4478.51 leh LT hrui km. 3067.08-a thui zam a ni bawk.

Financial year 2015-16 chhung khan Mizoramin kawlphetha million unit 338.875 hman a ni a, kawlphetha aṭang hian cheng vbc. 165.9685 hmuh chhuah a ni.

Chief Minister hian UJALA & Pavan scheme a hawng nghal a; he scheme hi LED bulb, tubelight leh ceiling fan-te man tláwm zawka mipuiin an lei theihna tura ruahman a ni. LED bulb leh ceiling fan-te chu lei theih a ni tawh a, tubelight erawh chu ni 10 hnu velah hralh chhuah theih beisei a ni.