Damdawi-in fai berte hnenah lawmman hlan

Mizorama district hospital zingah Champhai District Hospital chu fai bera thlan a ni a; commu-nity health centre/sub-district hospital zingah Vairengte Damdawi-in chu fai bera thlan a ni.

Damdawi-in faia inelna, Kayakalp Award chu nimin khan Lal Thanhawla Auditorium-ah sem a ni a, Health minister Lal Than-zara'n a hmanpui. Health Minister leh Health prin-cipal director Dr K Ropari ten lawmman an sem.

Lal Thanzara chuan, mipui hriselna tura tih tur pawimawh hmasa ber chu thianghlimna a ni tih sawiin, "Damlo leh a enkawltute tan damdawi-in leh a chhehvelah thil ṭha lo thlen thei bawlhhlawh leh hnuam hnawk dang a awm tur a ni lo," a ti.

Health Minister chuan, Mizote chu zûk leh hmuam leh ruih theih thil dang tih nasat vang te, ei leh in uluk loh vangtein hnam hrisel lo an ni tih sawiin, "Cancer vei tamna state kan ni hi a zahthlak," a ti a; ṭhangtharte chu ṭhangharh a, taksa hriselna khawih pawi thei chìn dawklak bànsan turin a ngen.

October 2, 2014-a India rama faina beihpui thlakna, Swachh Bharat Abhiyan hawn hnuah Health department hnuaiah damdawi-in leh a vel faina lama inelna turin Kayakalp-Swacchta Guidelines duan a ni a, damdawi-in fai inelna Kayakalp pawh May 15, 2015-ah kalpui ṭan a ni.

Mizoramah chuan Kayakalp hi July 9, 2015-ah hawn niin, October 5, 2015-ah inelna hmasa ber neih a ni a; a bul ṭan nan kum 2015-ah chuan district hospital-ah chauh inelna buatsaih a nih laiin, kuminah erawh chuan district hospital, SDH/CHC leh primary health centre-ahte inelna buatsaih a ni.

Kuminah hian district hospital zinga fainaa inelnaa pakhatna aṭanga pathumnate'n Rs. 3,00,000, thuchei leh memento an dawng ṭheuh a; SDH/CHC inelnaa pakhatnain Rs. 10,00,000 dawngin, pahnihnain Rs. 4,00,000 leh pathumnain Rs. 3,00,000 an dawng. PHC-ah erawh chuan district tinah damdawi-in fai ber ṭheuh thlan a ni thung.

Damdawi-in fai tehnaa 70% hmu pha district damdawi-in pahnih, CHC pali leh PHC 37 hnenah Commen-dation Award sem a ni bawk.

Kayakalp Award dawngte

DISTRICT HOSPITAL

1-na Champhai District Hospital

2-na Serchhip District Hospital

3-na Kolasib District Hospital

SDH/CHC

1-na Vairengte CHC

2-na Biate CHC

3-na Hnahthial CHC

PRIMARY HEALTH CENTRE

Aizawl West District Aibawk PHC

Aizawl East District Thingsulthliah PHC

Kolasib District Bilkhawthlir PHC

Mamit District Phaileng PHC

Champhai District Hnahlan PHC

Serchhip District N.Vanlaiphai PHC

Lunglei District Buarpui PHC

Lawngtlai District S.Lungpher PHC

Siaha District Chhuarlung PHC