Aizawl-Lunglei kawng dan tum ṭhulh turin Health Minister-in zirlaite a ngen
Health minister Lal Thanzara chuan, Lunglei Civil Hospital aṭanga doctor sawn chhuah vanga Lunglei MZP-te'n Lunglei-Aizawl World Bank kawngpui dan an tum chu ṭhulh turin a ngen a; sowrkar harsatna neih mekte hriatthiampui turin a ngen bawk.
Nimina Kayakalp Award semnaa thu a sawinaah Health Minister chuan, Lunglei district tana zirlai pawlte ṭha-hnem-ngaihna chu a hriatthiampui tih a sawi rualin, mipui tana rokhawlhna siam zawnga lungawi lohna lantir lo turin a ngen a; zirlaite duhna chu remchang hmasa berah tihpuitlinsak ngei a tum thu a sawi.
Lal Thanzara chuan, Mizoram sorkarin Lunglei a ngaihthah lo tih sawiin, "District danga awm ve lo CT Scan khawl pawh Lungleiah dah tuma hmalak mek a ni a, Aizawl tih lohah chuan doctor nei ngah ber an ni. Mizo-ramah doctor indaih lohna a nasat em avangin inpeizàwn dan ngaihtuah a, doctor awm lohna khaw hnaivai hmui turin ruahmanna siam tum a ni," a ti.
Health Minister chuan Vanglaini palai zawhna chhangin, Lunglei Civil Hospital-ah doctor duhkhawp awm lo mah se, doctor sawn chhuah tâkte chu mamawh zawkte hmuna dah an nih thu a sawi a; National Health Mission hnuaiah doctor thawk tur an awm chuan lak thuai an tum a, lak veleh Lungleiah dah nghal an tum thu sawiin, MZP-te chu inhnûkhniam hrâm tura a duh thu a sawi bawk.
MZP headquarters, Lunglei chuan Lunglei Civil Hospital-a doctor pathum, tun hnaia sawn chhuahte Lungleia sawn lêt leh tura sorkar an ngennain awmzia a neih loh avangin vawiin zing dar 7 aṭangin tiam chin awm loin Pûkpui dáiah Lunglei-Aizawl World Bank kawngpui dan an tum a ni.
Lunglei Civil Hospital-a awm ṭhin doctor pathum sawn chhuahte chu - Dr Thaizii, Dr Lalremruata leh Dr B Lalhriat-puia (AYUSH)-te an ni a; sawn an nih avang hian Lunglei MZP-te chuan November 8, 2016 khan Lunglei Civil Hospital Medical Superintendent pisa tualah transfer order copy an lo hâl tawh a ni.
Chhimbial Chhantu chuan thuchhuah siamin, Lunglei Civil Hospital-a doctor pathum, anmahni thlaktu tur dah loa sawn chhuah an nih chungchanga Lunglei MZP hmalakna an thlawp thu an tarlang a, "Hmalak chhunzawm zelna turah pawh theihtawp chhuaha ṭawiawm zel kan tum," an ti.
Lunglei Civil Hospital chu Mizoram chhim lam mipuite pan ber ni mah se, kawng tam takah thuam chak a ngai a, doctor pawh an indaih lo hle nia sawiin Chhimbial Chhantu chuan, "Hetianga doctor an indaih loh em em laia doctor pathum lai an aiawh tur dah loa sawn chhuah an ni hi pawi kan ti tak zet a ni," an ti a; doctor pathumte aiawh tur dah thuai turin thuneitute an ngen.