KHAWTHLIR

Tlân phal lo

Traffic SP chuan thupek chhuahin, zanin aṭang hian zan tin dar 7 aṭanga a tuk zing dar 3 thleng Sikulpuikawn leh Upper Republic, Raj Bhavan panna pêng kawngpui inkar siamṭhat hna PWD-in an thawh dawn avangin, hna thawh hun chhungin lirthei eng chi pawh tlân phal a nih dawn lo tih a tarlang.

DC-in tlawh

Serchhip DC Dr Lalrozama chuan UDPA department-in Serchhip Field Venga auditorium an sak mek a tlawh a, hna thawh dan a enfiah. Auditorium sak mek hi mi 1,000 len theihna tura ruahman a ni a, hall lian bakah committee room, ṭhut chawlhna tur leh pindan dang eng emaw zat awmin, hawn mai theih tura peih thawkhat tawh a ni.

Leiin chhilh hlum

Saron Vêng Presbyterian Kohhran aṭanga Manikbond-a work camp kalte'n nimin chhuna hna an thawh laiin lei minin mi pathum a delh a; leiin a chhilh zinga mi H Zalena (kum 65 vel) h/o C Ropari, Saron Veng a thi. Leiin a chhilh dang pahnih, C Lalbiakthanga, Saron Vêng kohhran upa leh a hmuna thawk missionary pakhatte na lutuk loin an hliam bawk.

Loneitute zirtir

Krishi Vigyan Kendra (KVK), Lawngtlai district chuan, nimin khan Thingkah khuaah lo neitute tan IPM orientation training under RKVY an buatsaih a, loneitute hlo chanchin leh a buaipui dante leh thlai tichhetu rannung leh a buaipui dante an zirtir.

NYK sawiho

Nehru Yuva Kendra (NYK), Lunglei hnuaia District Advisory Committee on Youth Programme chu nimin khan Lunglei DC conference hall-ah Lunglei DC Lalzarmawii hoin an
ṭhukhawm a; NYK Lunglei hmalaknate thlirhoin, Annual Action Plan 2016-17 an sawiho nghal.

VC bye-election

Mizoram State Election Commission chuan thuchhuah siamin, Mara Autonomous District Council huam chhunga village council pariata bye-election neih hun atan December 15, 2016 a ruat.