Chin ṭhalaite'n Governor an kâwm

Myanmar aṭanga lo zin, Chin Youth Organisation (CYO) palaite chuan, nimin khan Raj Bhavan-ah Governor Lt.Gen. Nirbhay Sharma an kâwm a, thil pawimawh hrang hrang an sawiho.

Larsap chuan, CYO member-te chu Mizoram khawtlang leh sorkar inrêlbâwl dan zir chiang a, zirna leh hriselna lama hmalakna hrang hrangte rawn hmelhriat an duh chu lawmawm a tih thu a hrilh a, "India leh Myanmar ramri chu ‘soft border’ a nih angin a lehlam ve vea mi chengte innêl leh zalen taka inkalpawh theih a ni a, hei hi ram pahnih-te inkara thawhhona leh inhriatthiamna a tiṭha hlein ka hria," a ti.

CYO member-te chuan, Mizoram khawtlang nunphung leh inrêlbâwl dan bakah, khawpui, thingtlang leh district lama sorkar inrêlbâwl dan leh hmasawnna hna kalpui dante zir tura rawn kal an nih thu sawiin, "Mizoram University leh kan rama university-te thawhhona kawng pawh dap kan tum a ni," an ti a; Myanmar zirlaite'n MZU-ah research an tih theihna atana hmalak an tum thu an sawi.

CYO member Mizorama rawn zinte hi an president Jacob Thang-in hoin, mipa 10 leh hmeichhia pariat an ni.