Black money a bo mek : BJP President

BJP Mizoram Pradesh-te chuan, sum chhehrelh leh eiruknate venna tura prime minister Narendra Modi kaihhruai sorkarin Rs. 500 leh Rs. 1,000 note an tihthih chu ṭha an tih thu an sawi a; sorkar hmalakna vangin black money a bo mek niin an tarlang.

Mizoram BJP president Prof. JV Hluna chuan nimin khan Aizawl Press Club-ah thuthar thehdarhtute kâwmin, "PM Narendra Modi-a'n eirûk tihbo a nih theih nan te, pawisa chhehrelh (black money) tihtawp nan te, firfiaka chêtna leh pawisa lem lêng vel tihtawp nana Rs. 1,000 leh Rs. 500 note a tithi hi ṭha kan ti. He thutlukna hian eirukna, chhiah âwlrûkna/hlemhletna, firfiaka chetnate a tihkiam dawn avangin India ram tana hmasawnna thlentu tur méllung pawimawh ber pakhatah kan ngai," a ti.

Sorkar laipui hmalakna chuan mirethei leh harsa zawkte tan hun remchang a siam dawn nia sawiin, JV Hluna chuan, "India pawisa vaibelchhe tél chhehrelha awmte a rawn inpho lang mek zel a, rálthuam tawlhrûk, firfiaka chetna, pawisa chhehrelh leh pawisa lem tam tak léng vel a tikiam ṭan mek a ni," an ti a; sorkar laipui thutlukna chu India ramin hma a sawn phah hle dawn niin a sawi.

Mizoram BJP President chuan, pawisa note tihthih chungchangah, mi dang harsatna siam zawng leh mi bum tuma khawsa lo turin mi tin a ngen a, "Ram tana ṭha tur a ni tih hria a, hun rei lo te chhung atana harsatna kan tawh mek hi chhel taka tuar hram hram turin Zoram mipui kan ngen a ni," a ti bawk.