Technology lama intihsiakna lawmman sem

Science & Technology department-in tualchher thiamna hmanga technology lama thil thar siam chhuaktu leh ngaihtuah chhuaktute tana intihsiakna a buatsaih, Indigenous Grassroot Technology & Innovation (IGTI)-a ti ṭhate hnenah nimin khan Directorate of Science and Technology conference hall-ah lawmman an sem a, Planning minister Lalsawta'n a hmanpui.

Lalsawta chuan, Mizo zingah tualchhuak thiamna ṭangkai tak tak ngaihtuah chhuak an awm chu lawmawm a tih thu sawiin, "Ram hmasawnna atana ṭangkai tur, khawvel ram dang pawhin hman tlaka an pawm tur thil chher-chhuak belh zel tur Mizoram aṭang ngeia siam chhuah theih a nih ka beisei," a ti.

Planning Minister chuan, thil siam sa aṭanga a nihna dik tak leh a hman ṭangkai theihna hmuh chhuah tur tam tak a la awm ṭeuh tih sawiin, "Science leh technology hmanga an ṭangkaina khawrh chhuah theih a ni," a ti a; thil thar hmuh chhuah chu ram dang mithiamte kuta dah mai lo turin kalkhawmte a chah.

Planning secretary Dr C Vanlalramsanga pawhin thu sawiin, "Tunlai khawvelin a ngaih pawimawh em em chu hmasawnna huap zau leh háwl kim a ni a. Science leh technology lamah pawh a langsar leh thil ti theite kutchhuak chauh ni lo, grassroot level thlenga a huap chuan mi tam zawkin hmasawnna an chhawr phah dawn a ni," a ti.

IGTI Competition-ah hian pa-tent la file lohna chauh tel phal a ni. Intihsiakna hi district level leh state level-a buatsaih niin, category pahnih - prototype category (technology lama thil thar siam chhuaktute inelna) leh idea category (technology thar ngaihtuah chhuaktute) siam a ni.

Prototype category-ah lawmman hi pakhatna Rs. 15,000, pa-hnihna Rs. 10,000, pathumna Rs. 5,000 pek a ni a; idea category-ah pakhatnain Rs. 5,000, pahnihnain Rs. 3,000 leh pathumnain Rs. 2,000 an dawng.

State level inelna chu prototype category-ah chiah neih a ni a; pakhatnain Rs. 50,000, pahnihnain Rs. 25,000 leh pathumnain Rs. 12,000 an dawng. Lawmman dawngtute chu - pakhatna Chhuanmawia, Haulawng; pahnihna C Vanlalawmpuia, Champhai Veng-thar leh pathumna Jonah L Pa-chuau, Ramhlun North te an ni.