LRS-in Stamp Act hnuaia chhiah zat Tihhniam dawn leh dawn loh an hre lo

Mizoram sorkar chuan Stamp Act hnuaia rate sang pete chungchang a la ngaihtuah lo. Hetih lai hian, Land Revenue & Settlement (LRS) department chuan The Indian Stamp (Mizoram Amendment) Act, 2016 hnuaia chhiah rate tihhniam a nih dawn leh dawn loh an hre lo.

Vanglaini palai zawhna LRS department hotute'n an chhan danin, The Indian Stamp (Mizoram Amendment) Act, 2016 anga chhiah pete chungchang chu ngaihtuah a la ni lo a, sorkar aṭangin thu dawn an la nei lo. Sorkar aṭanga thu an dawn veleh Stamp Act rate sanga pete chungchang chu ngaihtuah a ni ang a, ngaihtuah thuai theih an beisei.

The Indian Stamp (Mizoram Amendment) Act, 2016 duh lo hian MNF ṭhalaite chu October 24, 2016 khan LRS directorate tualah an pungkhawm a, pisa kai turte an dang. Hemi ní hian LRS Minister hoin official-te an ṭhukhawm a, Stamp Act thar chu hman tawh rih loh turin an ti (suspend) a, a hma anga chhiah pek leh tura tih a ni. Rate thar anga chhiah lo pe tawhte chungchang chu a kaihhnawih department dangte nena ngaihtuah tura tih a ni.

MNF ṭhalaite chuan, Stamp Act thar hnuaia chhiah pek ngai chu a sang lutuka an hriat avangin lungawi lohna an lantir a ni.

Zawhna chhangin LRS department hotute chuan, Stamp Act thar suspend a nih chhan chu MNF ṭhalaite nawrna vang ngawr ngawr a nih loh thu an sawi a, "Tih hmaih/dik tawk loh kan neih vanga suspend kan ni. MNF
ṭhalaite nawr vang a nih ve theihna chhan erawh a awm a, kan tih hmaih/dik tawk loh lai hi an rawn sawi chhuak a ni," an ti.

Revenue department hotute chuan, The Indian Stamp (Mizoram Amendment) Act, 2016 chu hman zui leh a nih dawn thu sawiin, "He Act hi paih/ṭhiah a ni lo a, suspend lailâwk mai a ni. Siamṭhat ngaite siam ṭhat a nih hnuah hman leh a ni ang," an ti a; chhiah rate tihhniam a nih dawn leh dawn loh chu sorkar thu thu a nih avangin an hriat loh thu Vanglaini an hrilh.

The Indian Stamp (Mizoram Amendment) Act, 2016 chu Rules siam a nih hma leh ram hlutna chhût dan tur duang tur, Valuation Committee din a nih hmain hman ṭan a ni a; dan thar hnuaiah hian stamp duty chu a lêt tam takin a pung a ni.

The Indian Stamp Act chu Mizoramah siam remin kum 1997 aṭangin The Indian Stamp (Mizoram Amendment) Act, 1996 hman ṭan a ni a; he dan hi kum 2007 khan tihdanglam niin, stamp duty atan ram hlutna (market value)
aṭanga chhûta 0.5% lak a ni ṭhin. Dan chu tihdanglam leh niin, Assembly chuan The Indian Stamp (Mizoram Amendment) Act, 2016 chu March, 2016 khan a pawm a ni.

The Indian Stamp (Mizoram Amendment) Act, 2016 atana Rules duan chhin, Draft Rules chu Council of Ministers chuan September 21, 2016 khan an pawm.

Sorkarin April 18, 2016-a notification a tihchhuaha a lan dan chuan, dan thar hmang tur hian ram hlutna chhût dan tur ngaihtuahtu Valuation Committee din tur a ni a; Committee-ah hian Inspector General of Registration and Commissioner of Stamps ruat tur a ni. Valuation Committee hnuaiah hian district leh sub-district tinah Market Valuation Sub Committee din tur a ni bawk.