MZP-in Aizawl-Lunglei kawng an dang

Mizo Zirlai Pawl headquarters, Lunglei chuan, Lunglei Civil Hospital (LCH) aṭanga doctor pathum an aiawh tur dah loa sawn chhuah an nih vanga lungawi loh lantir nan, nimin aṭang khan tiam chin awm loin Lunglei Pûkpui dáiah Lunglei-Aizawl World Bank Road an dang chat.

Lunglei MZP thuchhuah chuan, niminah pawh sorkar aṭanga thu lawmawm an la dawn loh avangin vawiinah pawh zing dar 7 aṭangin kawngpui an dang leh dawn tih a tarlang. Vawiinah chuan Aizawl-Lunglei World Bank Road bakah, National Highway no. 54 pawh Hrangchalkawnah an dang dawn tih an puang.

Lunglei MZP chuan, thuneituten ram pum huapa doctor indaih lohna a nasat thu an sawi chu eng emaw chenah dik mah se, hmunpui zawkte thlirin pawm har an tih thu an sawi a, "Tun dinhmunah LCH-ah department tinah docctor pakhat zel an awm a, Aizawl Civil Hospital-ah chuan doctor 105 awmin, department ṭhenkhatah doctor 8/9-te an awm a ni," an ti.

LCH-a doctor pathum, an aiawh tur dah loa sawn chhuah chu hriatthiam har an tih thu sawiin, "Aizawl CH hi kan thîk tihna ni loin, LCH pantute ngaihtuahin, department tinah doctor pahnih zel awm ve thei se," an ti a; doctor pathumte aiawh dah an nih ngei theih nan hma an lak zel dawn thu an sawi.