Police-in Meth mûm 5,676 an man

Aizawl SP hnuaia District Special Branch (DSB)-te chuan, nimin khan Methamphetamine R-7 (Meth) mûm 5,676 an man a, a neitu nia hriat mi pahnih an man tel bawk.

Police PRO thuchhuah tar-lan danin, nimina Meth an man hi tualchhunga an hralhna ang chuan, Rs. 6,84,000 hû a ni a; a neitua puh an mante chu Ramnunsiami (42) d/o Vankunga, Zawngin khua nia inchhál leh Sangkima (53) s/o R Lalhmingliana, Rengdil khua nia inchhálte an ni. Police-te chuan NDPS Act hmangin thubuai an siamsak.

Police thuchhuah chuan, tun hnaia police-te'n Aizawla thil sual ti an mante a tarlang. Aizawl veng hrang hranga two wheeler rûk chíng K Hunlawmawma (18) s/o K Lalmawizawla, Vaitin chu November 10 khan Vaitinah an man a; K Hunlawmawma hian hriat theih chinah Aizawl hmar lamah kumin chhungin two wheeler 10 chuang a ru tawh a, a rûk zinga bike pathum chu running condition-a hmuh lêt a a ni a, bike tam zawk part a ṭhiah darh tawhte pawh eng emaw zat hmuh lêt a ni.

November 7, 2016 zana GAD Aviation Wing Office, Secretariat Annex NLUP Building tukverh kalhna tichhiaa office pawisa Rs. 5,47,180 rutu Zohlimpuia (35) s/o Rothangliana, Khatla pawh November 10 khan an man a; a kut aṭangin Rs. 5,00,500 an hmu lêt.

November 9-a Grace Nursing Home, Lower Zarkawt aṭanga damlo pawisa rs. 76,000 rutu Vanlalruati (38) d/o Liankhama (L), Tlangnuam Vengthar pawh November 13-ah an man a, a kut aṭangin Rs. 5,800 hmuh lêt a ni.

Mipa naupang pahnih hruai bo a, mipat hmeichhiatna hmanpui tuma puh Lalnghakzuala (23) s/o Lalfakzuala, Khuangthing pawh Khatla West Khawtlang hruaitute puihna azarah November 14 zan khan an man bawk.

Mizoram police-te chuan, misualte man an nih theih nan leh dan anga rorelsak an nih zel theih nan theihtawpa police-te thawhpuio turin mi tin an sawm a ni.