Krismas vuakveta rálmuanna sawiho

Krismas leh kumthar vuakvêta Serchhip mipui-te'n boruak rálmuang leh nuam taka hun an hman theih dan tur ngaihtuahin, nimin khan Serchhip DC Dr Lalrozama hoin a pisaah sorkar official leh khawtlang hruaitute an ṭhukhawm.

Dr Lalrozama chuan, Home Minister hoa state level meeting-in an rêl tawh zûlzuiin meeting koh a nih thu sawiin, "Sorkar chuan mipuite hlim leh thlamuang taka Krismas leh kumthar hmang turin a duh a, chutianga boruak muanawm tak a awm theih nan chuan khawtlang hruaitu te, tlawm-ngai pawl te, kohhran te, chanchinbumite nena thawh-ho kan mamawh a ni," a ti a; khawtlang hruaitute chu hmalakna atana ṭha an tihte inthlahrung loa sawi turin a ngen.

Serchhip SP Lalringdika chuan police hmalak dan sawiin, "Sokar khap thil, hâl-puah, hâlmawi leh silai lem a mû neite Serchhip khaw chhung dawr hrang hrang kan vâi ṭan tawh a, tun thleng chuan man tur a la awm lo," a ti a; December thla aṭangin nasa zawka hma an lakna tur hrang hrangte a sawi.

Meeting-ah hian veng hrang hranga street light ṭha lo siam ṭhat te, tlawmngai pawl leh police-te thawhhona ṭha zawk awm theih dan tur te, kohhran hrang hrangte nena ṭangruala hmalakho dan turte an sawiho a ni.