CADC-a cheng vbc. 20 tihchingpen nia an hriat MNF-in bawhzui an tum

MNF party chuan thuchhuah siamin, Chakma Autonomous District Council (CADC) sorkara cheng vbc. 20 tihchingpen nia hriat, Governor Lt.Gen. Nirbhay Sharma hnena an thlen hnua tun thlenga bawhzui a la nih loh avangin an lawm loh thu an tarlang a; MNF-in theihtawp chhuaha ûm zui zel an tum thu an sawi.

CADC sorkarin cheng vbc. 20 dik lo takin an tirîral nia an hriat avangin MNF district headquarters, Chawngte chuan November 13, 2016-ah Governor hnenah lehkha an thehlut a, lehkha pawimawh awm ang angte an thehlut tel. Chawngte MNF-te chuan Governor chu cheng vbc. 20 vel chingpen nia an hriat chu chhui chiang a, a mawhphurtu CADC-a Congress sorkar chu ṭhiat turin an ngen a ni.

Governor hnena lehkha an theh-luhah chuan, cheng vbc. 20 vel dik lo taka tirîraltu chu CADC-a chief executive member (CEM) Kali Kumar Tongchongya hun lai kum, kum 2008-2013 inkara thil thleng niin an sawi a; a hnua Congress tho CEM pahnih - Dr Buddha Dhan Chakma leh Buddha Lila Chakma te hun, kum 2014-2015 inkara tihchingpen a nih thu an tarlang tel bawk.

Chakma district MNF-in Governor hnena an thehluh zinga pakhat, ‘Modernisation of Kalamanagar Town’ hnuaia hnathawhte chu NLCPR Technical Team-in a hmunah an endik a, an report aṭangin Ministry of Development North Eastern Region (DoNER) joint secretary Vijay Bhusan Pathak-a'n Mizoram Chief Secretary hnenah lehkha thawnin, a hma thei ang bera tichiang a, DoNER-ah sawifiahna thawn turin a ti niin an tarlang.

MNF thuchhuah chuan, "Hei hi vawiin thlenga bawhzuina leh hma-lakna a la awm loh avangin nasa taka bawhzui tum a ni. Corruption a zung chawpa phoro tum anga insawi Congress sorkar hian hetiang khawpa sum tam tham tihchingpena awm hi a phoro ngam dawn em, tih hi MNF General Headquarters chuan a zawt a ni," a ti.