Chin palaite leh CM Hawla an inkâwm

Chin Civil Society Network palaite chuan, Nilaini tlai khan chief minister Lal Thanhawla chu a chenna bangla-ah an kâwm a, thil chi hrang hrang an sawiho.

Chief Minister kumin, kum April thlaa Tahan-a Chapchar Kût hmanga a zin chuan Mizoram mipui leh Myanmar-a cheng Zo hnahthlakte inkara inunauna leh inlaichinna nghet leh thûk zawk a thlenna kawngah rah duhawm tak a chhuah ngei a beisei thu a sawi a, "Chin state Chief Minister pawh Mizorama zin turin ka hrilh," tiin, Chin CM chu MIzorama a rawn zin vat a beisei thu a sawi.

Lal Thanhawla chuan, Ka-lay University leh Mizoram University-ten thawhhona nei thei se a duh thu sawiin, "Zirlaite intlawhpawhna leh cultural exchange neih chu thil ṭha tak leh hlawkthlak tak a nih ka ring," a ti.

Chin Civil Society Network palaite chuan, an rawn zin chu Mizoram leh Chin state inkara inunauna leh inlaichinna ṭha intannaah an ngaih thu an sawi a, "Central YMA-in felfai takin kan zinna programme min duansak a, kan lawm hle. Khaw hrang hranga YMA-te'n min lo dawnsawn danin kan rilru a khawih hle," an ti. CCSN hian CM hi ngaihhruina thilpek an hlan a ni.